Ofis Publik ar Brezhoneg
Er barrez kentidik-mañ e oa Tregeneg, Gorre Beuzeg (e Sant-Yann-Drolimon hiriv-an-deiz) ha marteze Tremeog. Plouev (deuet diwar al latin plebem, pobl) eo tamm kentañ an anv. Elfennoù diazez an aozadur e Breizh e oa ar plouevioù. Krouet int bet gant ar Vretoned pa'z int en em staliet en Arvorig, adalek ar IVvet kantved. Bras-mat e oa tachenn ar plouevioù. Diwezhatoc'h int bet lodennet, e karterioù pe trevioù. Merket-sklaer e oa o harzoù, gant menezioù roc'hellek, stêrioù pe hentoù kozh. Peurvuiañ eo anv ur sant a zeu en anv da-heul Plou-. E-giz-se emañ kont amañ, Eneour o vezañ ar sant enoret. Hervez an Hengoun dre gomz e oa hemañ un ermit, breur da Santez Tunvez, enoret-hi e Ploveur hag e Keriti Penmarc'h. Evit talvoudegezh Lanwern, gw. e fichenn an anv-mañ end-eeun.