Ofis Publik ar Brezhoneg
"Cauno/Cauna" eo stummoù koshañ an anv testeniekaet dre skrid, en XIIvet kantved. Moarvat eo savet diwar ur ger rak-latin "Cauna", hag a dalvez "creux, cavité, grotte". Heñvel eo e dalvoudegezh ouzh ar brezhoneg modern Kav. En anvioù-lec'h e c'hall ar ger brezhonek-mañ bezañ emdroet e meur a zoare. En e stumm friet "Kaon", evel amañ, e vez kavet en un anv brudet e gourenez Kraozon, gant ar ger-mell dirak : "Le Caon" ouzh ar c'hartennoù, "Ar C'haon" e brezhoneg, gant ar c'hemmadur K/C'h da-heul ar ger-mell. En anv zo kaoz amañ, n'eus ger-mell ebet er penn kentañ.